لقاء مع النوخذه الكويتي : ماجد الماجد :

فعلا صيد السبيطي غير، لأنه صعب وعزيز وصيده متعة وطلعته بالطراد تشرح الصدر، وفي عيون عشاقه يسوي سوقimagesCA7BQ السمك كله.. له نبرة خاصة وطرق واسرار يبيلها حداق عود ومخضرم وخبرة بالبحر والصيد.. ومو كل حداق يصيده..

ملك السبيطي الحداق المخضرم ماجد خالد الماجد يفيض بمعلوماته التي استمدها من المدرسة البحرية العم خالد الماجد، وتعلم منه اصول البحر واسراره وعشق صيد السبيطي الى درجة لا تحدها حدود.. أبحرنا معه في رحلة خاصة ممتعة مملوءة بالمعلومات والارشادات والاسرار عن صيد السبيطي، وعرفنا موسمه واوقاته وماياته وييمته وخيطه وافضل محادقه، سواء الجنوبية او الشمالية.. فماذا يقول بوخالد؟

في البداية قال: تعلمت أصول البحر وأسراره من مدرستنا البحرية الوالد بو ماجد.. حداقنا العود وخبير الصيد وخاصة بالسبيطي ومعرفة صيده من الألف إلى الياء.. حتى أصبح السبيطي بالنسبة لي عشق وغير عن كل السمك، وعزيز على قلبي واستمتع جدا لما يكون صيده صعب، وفي محادق صعبة وطبعا يبيله مطرح وأوقات ومايات.

وقال: في العام الماضي توفقنا بصيده، وخاصة في موسمه شهري 10 و11 في الفنطاس، وكنا نتحاشى الشعرى من كثرته، ولكن هذه السنة ما بينت إلى الآن تباشيرها.. وإن شاء الله متأملين مع بداية الموسم.

وأضاف: السبيطي يبيله حسبة مايات.. لأنه فيه ميزة يا ياخذ معاك أول الماية أو بنصها أو بآخرها وخاصة بالقطع.. وبالتالي إذا ما حدقت على ماية كاملة ما تصيده، ومن المتعارف عليه ان السبيطي عيار، ويبيله هدوء من غير قرقعة وييمه ما يقاومها والتي ارشحها هي «المصير» وخاصة الأحمر رقم واحد.. وايضا اذا عطيته الخيط لحف، واذا سحبت عليه قص، وبالتالي صيده فن وخبرة لذلك لما يضرب عليك السبيطي من اول ما ياخذ عليك الى ان يكون في اليزه.. قلبك يرقع عكس اي سمكة ثانية وتسحبها عادي.

وقال الماجد: الشعم سهلة صيدته وكذلك النقرور والبالول إلا السبيطي صيدته غير، وفيها متعة، لأنك صايد شيء نادر مثل أهل البر لما يصيدون الحبارة تكفي عن صيد 50 فري أو 70 حمامة.. لأنها نادرة وكذلك الحال بالنسبة لأهل البحر في صيد السبيطي في صيده ونبرته وأكلته. وبسؤاله عن أفضل محادق السبيطي.. يقول الماجد: كل محادق الكويت طيبة وفيها خير، سواء الشمالية أو الجنوبية وعندك من راس السالمية إلى المنقف طول الصيف بالليل موجود فيها السبيطي ويوالم معاك عندق وشعري وقرقفان وبالول وقطع الفنطاس يوالمك فسكر، ومن شهر 9 بعد دلوق سهيل وحتى شهر 10 و11 يفيض السبيطي والشعم في الفنطاس، وأيضاً طول الصيف يفضل محادق الرشدان والدوحة لحداق الشعم على الشريب وفي شهر 6 بالحيشان يكثر السبيطي وشهر 11 و12 يكثر الشعم صوب الصبية وفي شهر 1 على طول الأطيان من الدفان إلى الخيوسة إلى طول الشتاء، وفي شهر 4 يبين النقرور وفي شهر 8 يبين بالجنوب وفي شهر 10 و11 بالأرياق. وكل وقت له سمكه.. والحداق الخبرة لازم يعرف هالمواسم والأوقات ويحرص على المايات.

ويقول الماجد: طول الصيف نحدق للسبيطي بالليل لأنه ما يأخذ عليك بالنهار وياخذ عليك بعد ما يقرص البرد من منتصف شهر 10 يضرب على الخيط المغرب والفجر وطول الليل إذا الماية زينة.. وأيضاً الحيشان بالصيف فيها كل سمكة وخاصة السبيطي.

أهم شيء المطرح

وأضاف: اختيار المطرح أهم شيء للصيد ولو تغير مكانك أمتار قليلة يتوقف عندك الصيد.. وأيضاً من المتعارف عليه ان السبيطي يرعى وإذا كنت تحدق في القطع وما كنت في مكانك ما تصيد.. وبالنسبة لنا حداقة الفنطاس نفضلها لأنها هادئة وما فيها دوس مثل الحيشان وزحمتها وازعاجها.

السبيطي عشق

وقال: اعشق صيد السبيطي في المكان الصعب، واستمتع لما يكون في مكان فيه لحوف او ميافر، وفي هذه الاوقات يصير تبادل وتحدي بينك وبينه، واكبر سبيطي صدناه في الفنطاس وييمتي مصير وكان حجمه عود، والمصير ييمته المفضلة والاولى، وما يمنع نحدق له بميده او خثاق او بربوق او يوافة ويضرب عليها، ولكن يبقى المصير مفعوله سحري، وخصوصا الاحمر، ويتم تنظيفه ووضعه في علب وتحفظ مبردة ونستخدمها وقت رحلاتنا البحرية.

ويقول الماجد: هالايام حداق السبيطي في الفنطاس، ونحن بانتظار ان يتعدل الجو وتهدأ الرياح، ونصيحتي لحداقته احرصوا على ماية الثبر، في اوقات الفساد، ومن افضل الايام للصيد تكون ايام 9 و10 و11 من الشهر العربي، و24 و25 و26 من الشهر العربي اخر مايات الفساد، يكون فيها الصيد اكثر.

واضاف: محادق الفنطاس متعة وتشرح الصدر وفيها سبيطي وهدوء وبعيدة عن الزحمة، وايضا تعلمت فيها وعرفت اسرار محادقها وحفظت ارضها وماياتها، وحتى لو ما صدنا فيها ايضا تعتبر متعة المحادق، والسبيطي بيني وبينه علاقة قديمة واحيانا تصير سوالف بينا لأني دائما اسأل عليه وهو كذلك يسأل علينا.

من جريدة القبس الكويتيه

اترك رد

%d مدونون معجبون بهذه: